De Tour in West-Vlaanderen

(The Jef Braeckevelt Blues)

Den Toer in Iepr’ en Zunnebeke,
’n een hoogdag binst de weke,
kom buut’n Jules, Germain en Jacqueline, 
de coureurs goan doar ollichte goan zien’.

Den Toer, den Toer in Poelkapelle,
ne rit van Iepre noa d’Helle,
eest reclame, klaksjes, stilo’s, Stimorol,
en voo de reste veel onnozelen brol.

Den Toer, den Toer in Westrozebeke,
Oto’s, moto’s, een indlikse lange reke,
zwoantjes zwaain de boane vrie,
kiek, doa zien’ z’ ool, d’eeste drie.

Den Toer de Frans in Roeselare,
de favoriet’n zit’n nog ool tegoare,
Mollema in ’t wiel en Vanmarck’ ip kop,
Cancellara en Kittel dei’n nog gene klop.

’t Pelotong’ rie nu Beitem voarbie,
met oenderd, oenderdviftig, kweet ‘et nie.
de meeste over’ under ne guidon gebogen,
kiek, Voeckler, ’t is em gescheet’n en gespogen.

Den Toer goat in Dadizele goan passeren,
nog gene van die goe die durft probeern,
Froome den Afrikoan, Contador de priesduve    
deez’n van sirro, sirro, sirro, komma vuve.

Den Toer riedt intus’n noa Meen’,
wie zit ‘r ool met dikke been’?
de wiend zit goed, de boan’ nie nat,
een pil’ in de pulle, een speit’ in ’t gat.

Nu nog Wevelgem en ton noa Lauwe,
langs de boane ier en daar een schone vrouwe,
coureurs, derailleurs, keek’ ns, platte band’n,
mo gauw, deez’n rie doa zoender ‘and’n!   

In Rekkem en ton den Dronckaert gepasseerd,
woa da Willy Voet nog mè drogaag’ é geparadeerd, 
joenk’eden, vrouwvolk, boer’n en boerin’,
ze zien’ ool in Vrankriek, goa nu moa were noa bin’. 


Patrick Cornillie